آخر شعر
للشاعر/ ممدوح حجاجي محمد
آخر شعر
آخر شعر هكتبهولك
وآخر كلام هسطرهولك
اوعي تفتكري أن ببعادك تبقي كسرتيني
يبقي إنتي كده لسه ما عرفتيني
انا منكرش اني حبيتك
وإن قلبي صار بيتك
بس البيت لو سابه ساكنه مبيبقاش ركام من تراب
مبيبقاش خراب
صحيح بياجوا عليه شوية تراب
وبيقفلوا شبابيكه والأبواب
لكنه بيفضل شامخ لا بينكسر ولا بينهدم
وبيجي عليه وقت وينسكن
بيسكنوه أكيد أحباب
وبيشيلوا كل ما عليه من تراب
بيفتحوا شبابيكه ويفتحوا الأبواب
آخر شعر هكتبهولك ومش زعلان
أصلي كنت عايش حالة جنان
بس فقت وكرهت الليل إللي سهرته عشانك
كرهت حضني إللي رميتي فيه احضانك
كرهت شعري وقصايدي إللي كتبتهالك
كرهت اليوم إللي اعترفت فيه بحبك
وكرهت قلمي إللي كتب احلا كلام فيكي
وكرهت القمر إللي تحت نوره كنت اناجيكي
بس رغم ده كله متفتكريش إنك كسرتيني
يبقي لسه ما عرفتيني
انا الصقر واصلي صعيدي
يعني مهما حصل الدمعه متنزلش من عيني
انا راجل يعني جبل والجبل ما يهزه ريح
انا الصقر والصقر لو حس بضيق
بيحلق في الفضا الفسيح
انا صعيدي والصعيدي علي الأرض زي الشجر
وعلي كد طيبته قلبه كيف الحجر
فده آخر شعر هكتبهولك
وآخر كلام أنا هسطرهولك
شعر/ ممدوح حجاجي محمد
ليست هناك تعليقات:
إرسال تعليق