العند تحدي ...
بقلم: شيماء الدالي
~~~~~~~~~~
مش قلت ده طريقك
ليه بترجع بالخطاوى
مهزوز ليه كيانك
ياللى انت عامل غاوى
عقل غايب
وطفل شايب
والعويل عامل بيداوى
على سن السيف بنعدى
عارفين هنقع والعند تحدى
نصدر اوامر لروحنا
ولا امر واحد يتنفذ
ونخدر نفسنا بكلام
ونقول يالا نتحفز
جهل موجود
يمكن مقصود
وبقينا بالوهم بنتلذذ
اعرف فين حدودك
عشان تثبت وجودك
مش قد المواجهه
يبقى بلاش تدخلها
ايه اللى بتكسبه
غير هزيمه بتنولها
حدد الخصوم
قبل الهجوم
واتعلم اللعبه واصولها
مع مبدأ الممنوع مرغوب
الشئ البعيد وارد محبوب
مكتوب خطر الاقتراب
واحنا نقرب بكل انجذاب
نفضل ندور
ويمكن نتهور
وفى الاخر نتصدم بالسراب
#بقلم: شيماء الدالى#
ليست هناك تعليقات:
إرسال تعليق